Nzoia yajiandaa kwa ajili ya msimu mpya

Bungoma

Alhamisi, Agosti 3, 2023

KNA na Levi Ndamwe

Kilabu cha Nzoia sugar inayoshiriki ligi kuu ya humu nchini FKF-PL, yenye makaazi yake ugani Sudi katika Kaunti ya Bungoma inazidi kujiaandaa kwa ajili ya msimu mpya 2023/2024.

Hapo jana, Agosti 2, kilabu hiyo iliiandaa majaribio kwa wachezaji kadhaa ili kuweza kuwapata wachezaji mwafaka wa kuweza kuendelea kusakata kabumbu katika kilabu hiyo msimu ujao. 

Kilabu hiyo imefikia katika hatua hiyo ya kuwasaka wachezaji baada ya wengi wa wachezaji waliokuwa katika kikosi hicho cha msimu uliokamilika kuweza kuondoka.

Majaribio hayo yaliongozwa na naibu wa mkufunzi mkuu wa kilabu hiyo,Bwana Peter Juma na meneja John Muraya.

Kilabu hiyo iliandikisha matokeo mema msimu uliopita chini yake mkufunzi Salimu Babu ambaye alienda zake na kujiunga na kilabu ya police kama naibu wa mkufunzi.

Chini yake mkufunzi huyo kilabu hiyo ilimaliza katika nafasi za tano bora na vilevile walikuwa miongoni mwa vilabu vilivyokuwa vikipigiwa upato wa kutwaa ligi kuu nchini kenya.

Itakumbukwa kwamba kilabu hiyo iliweza kupoteza mechi moja pekee nyumbani ugani Sudi, mechi ambayo walipoteza kwa mikono yao Kariobangi Sharks.

Nzoia ilikuwa na wachezaji mahiri ambao walifanya kazi yake Mkufunzi Salim Babu kuwa rahisi na kuweza kuandikisha matokeo mema.

Wachezaji wale mahiri waliweza kumezewa mate na vilabu vikubwa vikubwa kama vile Tusker,Ulinzi stars,Gor-mahia na Afc Leopards.

Licha ya kuandikisha matokeo mema,kilabu hiyo ilikumbwa na tatizo la kifedha na ilikuwa vigumu kwao kucheza mechi za ugenini katika viwanja vilivyo mbali kama vile; Uwanja wa Nyayo,Kasarani zote zilizoko Nairobi,ugani Mbaraki kule Mombasa na nyinginezo.

Vilabu vilivyocheza na Nzoia ugani Sudi vilipata taabu Sana.

Kilabu hiyo ilipata uungwaji mkono kutoka kwa mashabiki wengi sana na hili liliwapa motisha sana, kuweza kujimudu na Kufanya vizuri.

Swali lililosalia ni kwamba, Je,Nzoia itaendelea kuandikisha matokeo mema msimu ujao licha ya kuwapoteza wachezaji wengi pamoja na mkufunzi mkuu?.

Courtesy ; K. N. A